أسوء يوم في حياة ترامب

النهارده أسوأ يوم في حياة ترامب تقريبًا.. لو كنت نايم ومش متابع اللي بيحصل، احب اقولك إن ترامب خسر انتخابات التجديد النصفي، والحزب الجمهوري بتاعه فقد السيطرة تمامًا على مجلس الشيوخ ومجلس النواب مع بعض في ليلة تاريخية وغير مسبوقة! وحاليًا؛ خلاص أصبح معزول سياسيًا في البيت الأبيض، ودلوقتي احنا على بُعد أيام من استلام الديمقراطيين زمام التحكم الكامل في الكونجرس، وساعتها هيمسكوا سلطة الاستدعاء الفيدرالي وهيفتحوا سيول من التحقيقات في كل جرائمه وصفقاته المشبوهة اللي عملها على مدار السنتين اللي فاتوا، وجرايمه اللي ارتكبها في ملفات إبستين، ودي غالبًا هتكون بداية نهايته السياسية للأبد… طب ازاي ده حصل؟! عايز اقولك يا صديقي ان اللي شفناه خلال الساعات اللي فاتت في الانتخابات مكانش خسارة عادية… ده تحول لا يصدق، وانهيار كامل في قلاع الجمهوريين التاريخية اللي عمرها ما حصل فيها اللي حصل ده.
تخيل إن ولاية تكساس، المعقل الأساسي لترامب واللي الجمهوريين مسيطرين عليها بقالهم 38 سنة، طارت منهم وفاز فيها الديمقراطي “جيمس تالاريكو” على “كين باكستون” حليف ترامب المدلل!
ومش بس تكساس، ده حتى ساوث كارولينا اللي محتكرينها الجمهوريين من سنة 1998، الديمقراطية “آني أندروز” اكتسحت فيها “دارلين جراهام” أخت السيناتور “ليندسي جراهام” حبيب الصهاينة اللي مات من فترة.. وكمان خسرت بعد ما ترامب نزل بنفسه يدعمها! كل ده غير سقوط نورث كارولينا وكانساس، وجورجيا اللي فازت فيها كيشا لانس بوتومز كأول حاكمة سمراء للولاية!
بس المفاجأة الصادمة اللي مستحيل كان حد فينا يتوقعها من كام شهر، والضربة اللي جابت لترامب واللوبي الصهيوني في أمريكا (AIPAC) جلطة حقيقية، هي الصعود التاريخي للمسلمين والعرب وأصحاب المواقف الصريحة ضد الحرب على غزة!
لأول مرة في التاريخ نشوف الجراح المصري الأمريكي المقدم السابق “آدم حموي” بيكتسح الانتخابات في نيوجيرسي بنسبة 74% ويدخل مجلس النواب.. وده لو انت متعرفوش، هو طبيب مصري الأصل، سافر غزة مرتين أثناء الإبادة وعالج الجرحى واتحاصر هناك في مايو 2024، ولما رجع أمريكا قرر يخلى وقف تسليح إسرائيل ووقف حرب إيران عنوان حملته الانتخابية… وبسبب ده انتصر باكتساح على المرشح المنافس اللي كان عايش في حضن اللوبي الصهيوني!
ومش بس كده… كمان في ولاية ميشيجان؛ المرشح الديمقراطي المصري عبد الرحمن السيد أو “عبدول” متقدم دلوقتي وبقوة في سباق مجلس الشيوخ على الجمهوري حبيب ترامب “مايك روجرز”، وغالبًا نتيجة الانتخابات شبه محسومة بالنسباله، وهيكون تاني مسلم من أصل مصري يفوز والفرق انه هيدخل الكونجرس هذه المرة وليس مجرد مجلس النواب! تعديل: فاز خلاص! وده كله غير نجاح رشيدة طليب وإلهان عمر في الاحتفاظ بمقاعدهم رغم كل حملات التشويه والملايين اللي اتصرفت لإسقاطهم، وهجوم ترامب شخصيًا عليهم… انا عايز أقولك ان حجم الفضيحة خلى ترامب لأول مرة ميعرفش يقول “الانتخابات اتسرقت واتزورت” من كتر ما الخسارة ساحقة، وطلع من شوية يعترف بلسانه إن الناس شكلها كده مكانتش مستعدة تتحمل تبعات حرب إيران وإنها كانت سبب رئيسي في الخسارة؛ وحاليًا في تسريبات من صفحات أمريكية عن حالة انهيار وغضب داخل أروقة البيت الأبيض، وانه لغى جدول مواعيده كله بعد ما لقى نفسه فجأة محاصر بكونجرس معادي هيشل إدارته تمامًا! طبعًا ده مش معناه انه هيمشي من الرئاسة، لكن معناه ان الديمقراطيين هيوقفوا أي مشروع أو قرار هياخده، لإنهم هما اللي سيطروا على الكونجرس اللي بيمر من خلاله القوانين.. ف مش هيعرف ياخد قرارات في ظل سيطرتهم… وطبعًا هما كمان مش هيعرفوا يمرروا قوانين مش عاجباه لإن معاه حق الفيتو أو النقض الخاص بالرئيس، ويقدر يوقفلهم أي حاجة بردو، إلا لو اتفقوا مع الجمهوريين عشان يوصلوا لنسبة أصوات أكبر… يعني النتيجة زي ما قلنا.. شلل في النظام الأمريكي… تخيل انت يا مؤمن عايزك بس تتخيل إنه كان بيدعم كل اللي بيحصل في غزة وفاكر انه مش هيتحاسب… وكان داخل حرب إيران وفاكرها نزهة، وإنه هيسقط النظام والدولة هناك في كام يوم، ويمهد الطريق لاستيلاء اسرائيل على الشرق الأوسط والخليج… ويشاء ربك من فوق سبع سماوات إن الترابيزة تتقلب عليه، وهو اللي يخسر نظامه وأغلبيته ورئاسته ونفوذه في ليلة واحدة، وقريبًا مع فتح ملفات التحقيقات ضده، قد يخسر حريته نفسها! احنا بنعيش لحظات تاريخية وتحولات مجنونة لا يمكن الواحد كان يصدقها أو يتخيلها من كام شهر بس… سبحان المعز المذل والله العظيم…



